L’ISLAM ET LA PROPRETÉ

     الاسلام والنّظافة

L’Islam fine mette beaucoup l’emphase lors la propreté. 

Allah Ta’ala li même fine declaré: 

“Dans ça (masjid qui so fondation li lor taqwa) ena banne z’hommes qui content purifié zotte et certainement Allah li content banne qui purifié zotte.” (At Tawbah - 9:108) 

D’aprés Hazrat Ibn Abbas (رضى اللّه عنهما) et Dwah-haaq رحمه اللّه (ene Taabe’i et moufassir), masjid qui pé faire reference dans ça verset là c’est Masjid Qoubaa.

Hazrat Abou Hourayrah () fine dire qui ça verset là fine revelé en eloge de banne personnes qui ti ena l’habitude souvent pou alle dans Masjid Qoubaa et zotte ti ena l’habitude pou purifié zotte a chaque fois qui zotte ti pé alle toilette.

D’après Tafseer Rouhoul Ma-‘aani “purifié” dans sa verset veut dire qui:

“Banne habitants de Qoubaa ti servi de l’eau pou faire istinjaa.”

Donc, Allah Ta’ala fine tellement apprecié sa acte de propreté là qui dans Qur’aan meme li fine faire eloge de sa acte là et de banne personnes qui observe sa acte là.

Dans éne Hadith le Prophéte  fine dire: 

“La propreté c’est la moitié de imaan.” (Mouslim et Tirmizi)

Dans éne l’autre Hadith li fine dire:

“La propreté c’est la clé de namaaz.” (Ahmad)

Li fine aussi dire: 

“Certainement Allah li pure et li content la pureté, li propre et li content la propreté, li noble et li content la noblesse et li genereux et li content la generosité. Donc garde zotte la cour propre et pas imite banne juifs.”

La propreté et la pureté c’est éne acte qui totalement en accord avec la nature. Li pas seulement faire l’effet lors la santé, mais aussi lor la manière et la façon de penser. Nous capave faire la deduction de la bassesse de éne peuple et so pensée malsaine quand nous trouve sa peuple là pé vivre dans la malpropreté.

L’Islam fine mette l’emphase lors propreté dans chaque instant et chaque aspect nous la vie. L’Islam fine impose cinq fois namaz par jour et avec sa li fine declare la propreté (wazou et rhoussal) important. Pour ‘ibaadat nafil (namaz) et touche Qur’aan aussi l’Islam fine ordonne pou faire wazou.

De même façon l’Islam fine mette ene l’emphase special lors propreté sa banne membres qui reste plus decouvert qui les autres membre tel que figure, la main, li pieds et cheveux de la tête qui gagne la poussière plus. Donc bizin lave zotte souvent.

Beaucoup travail insaan faire avec la main. Donc la propreté de la main exige plus l’attention. Alors nous trouvé qui malgré qui li obligatoire pou lave la main dans wazou, mais en sus de ça l’Islam fine recommande pou lave la main jusqu’a poignée trois fois dans wazou meme. Avant et aprés repas, aussi li fine declare sounnat pou lave la main. De même dans rhoussal aussi li fine dire commence par la main. Aussi le Prophéte  fine recommende pou lave la main quand levé parce qui pas conné cotte la main capave fine porté pendant sommeil (Tirmizi – rapporté par Hazrat A. Hourayrah )

Pou nettoye néné, l’Islam fine dire pou mette de l’eau dans néné. Pou nettoye la bouche, l’Islam fine dire pou mette de l’eau dans la bouche (faire koul-li) et faire miswaak dans plusieurs l’occasion.

Li trés necessaire pou lave le corps entier. Donc l’Islam fine etablir éne systeme et fine declare rhoussal sounnat pour Joumou’a et le Prophéte  fine mette beaucoup l’emphase lors ça.

Ena possibilité qui banne jeunes et banne mariés zotte transpiré plus qui les autres puisque zotte engagé dans bane activités physiques et travail et sa necessite lavage le corps entier. L’Islam fine etablir ene principle bien efficace pour combler sa necessité là. Li fine declare ejaculation sperme ene cause pou faire rhoussal qui li soit en etat d’eveil ou sommeil - relation sexuel ou autrement.

L’Islam fine ordonne pou garde linge propre et li fine encourage pou peigne cheveux et traite li bien. Li fine recommende l’utilisation de parfum (pour banne z’hommes) et tire banne cheveux en bas les bras et l’ombril. Aussi li fine ordonne pou servi de l’eau pou faire istinjaa. Si ena impurté lors linge, lors le corps ou lors place cote pou faire namaaz, l’Islam fine ordonne pou nettoye ça impurté là a tel point qui namaz pas pou valable si pas fine nettoyé dans façon convenable. Li fine aussi ordonne pou lave banne joints le corps, taille z’ongles et pas laisse moustache longue; sinon li pou sali par nourriture, boisson et impurté qui sorti dans néné. Et aussi li fine ordonne pou grandi la barbe. Mais li fine mette l’emphase pou traite li bien. 

En bref, L’Islam fine ordonne la propreté dans tous aspects de la vie et de tout banne membre le corps; specialement banne membres qui plus affecté par la poussière, saleté, et impureté. De sa façon là l’Islam pas seulement fine ordonne la propreté et l’hygiéne; mais aussi fine montré a l’humain éne code de vie et éne mode de vie complet.


Mufti N.Limbada 

VALEUR DE 10 JOURS DE ZIL HIJJAH

الحمد لله رب العالمين وصلى الله على النبي الأمين محمد وعلى آله وصحبه أجمعين وبعد

قال الله تعالى وَالْفَجْرِ وَلَيَالٍ عَشْر

وقال النبي ( صلى الله عليه وسلم) مَا مِنْ أَيَّامٍ أَحَبُّ إِلىَ اللهِ تَعَالى أَنْ يُّتَعَبَّدَ لَه فِيْهَا مِنْ عَشْرِ ذِي الحِْجَّةِ يَعْدِلُ صِيَامُ كُلُّ يَوْمٍ مِنْهَا بِصِيَامِ سَنَةٍ، وَقِيَامُ كُلُّ لَيْلَةٍ مِنْهَا بِقِيَامِ لَيْلَةِ الْقَدْرِ

(رواه الترمذي عن أبي هريرة)

Tout louange a Allah ki maitre de l’univers ki fine accorde nou d’innombrables faveurs. Li meme le maitre supreme et le vrai proprietaire de sa l’univers là et tout banne kitchose ki capave existé.

Allah ta’aalaa pé dire:

 

وَلله ِمَا فِى السَّمَاوَاتِ وَمَا فِى الأَرْضِ وَإِلَى اللهِ تُرْجَعُ الأُمُوْرُ 

(109)

 “C’est a Allah ki appartient tout ceki ena dans banne les ciels et la terre et vers li meme tout kitchose pou faire retour.” (Al-e-Imran – S3 V109)

Tout banne kitchose ki banne insaan possedé li pou quelque temps. Allah fine accorde zotte sa banne kitchoses là temporairement pou ki zotte servi sa banne kitchoses là afin ki chaque insaan magine so createur et faire retour vers li. 

Rassouloul-laah (S.A.W) fine dire:

إِنَّ الدُّنْيَا حُلْوَةّ خَضِرَةّ، وَإِنَّ اللهَ مُسْتَخْلِفُكُمْ فِيْهَا فَنَاظِرّ كَيْفَ تَعْمَلُوْنَ، فَاتَّقُوا الدُّنْيَا ...

 
(رواه مسلم عن أبي سعيد)

“Certainement dounyaa li doux et vert et certainement Allah pou accorde zotte sa dounyaa là et li pou guetté comment zotte pou agir; donc faire attention concernant dounyaa…” (Mouslim – rapporté par Abou Sa’id (r.a))

Quand ene personne mort, tout so proprieté fini et li kite tou li allé. Et quand pou ena Qayaamate personne so proprieté pas pou existé excepté Allah.

Allah ta’aalaa pou dire le jour de Qiyaamah:

لِمَنِ الْمُلْكُ الْيَوْمَ ِللهِ الْوَاحِدِ الْقَهَّارِ )16(

 “Pou ki sanla eté le royaume absolu azordi?” Personne pas pou osé repone. Alors Allah meme pou repone: “Pou Allah ki tou seul et tout puissant.” (Al Ghafir – S40 V16)

Quand Allah li le maitre supreme, li accorde so faveur a celui ki li envie.

Allah ta’aalaa pé dire:

ذلِكَ فَضْلُ اللهِ يُؤْتِيْهِ مَنْ يَشَاءُ وَاللهُ ذُو الْفَضْلِ الْعَظِيْمِ {4}
“Sa c’est le faveur d’Allah li accorde a celui ki li envie et Allah li accorde grand faveur.” (Al Joumou’ah – S62 V4)

Parmi banne creature, Allah fine accorde superiorité a banne insaan. Parmi banne insaan, Allah fine accorde superiorité a banne musulman. Parmi banne musulman, Allah fine accorde superiorité a oummat de Rassaouloul-laah .

De meme parmi tout banne creature, Allah fine exalté le rang de Rassaouloul-laah .
Parmi banne mois, Allah fine accorde superiorité au mois de Ramadwan. Parmi banne jour, Allah fine accorde superiorité au jour de Joumou’ah. Parmi banne nuits, Allah fine accorde superiorité a laylatoul Qadr. Parmi banne livres, Allah fine accorde superiorité a Qour’aan-e-Karim. Parmi banne sahaabah, Allah fine accorde superiorité a Hazrat Abou Bakr .

De sa façon là meme les 13 premiers jours de Zil Hijjah aussi Allah Ta’aalaa fine accorde ene grand vertu et ena beaucoup actions ki l’Islam fine preconisé dans sa banne jours là et zotte renferme beaucoup sawaab.

Concernant les premiers 10 jours et nuits ena ene mention special dans Qour’aan-e-Karim et dans hadith.

Allah ta’aalaa pé dire:

وَالْفَجْرِ (1) وَلَيَالٍ عَشْرٍ (2)

“Serment par le matin et par 10 nuits.” (Al Fajr – S89 V1-2)

D’après Ibn ‘Abbas  sa 10 nuits ki pé faire mention dans sa aayate là, c’est 10 premiers nuits de Zil Hijjah.

Donc sa tout seul li suffi pou montrer l’importance de sa premiers 10 nuits là.

Rassouloul-laah  fine dire:

مَا مِنْ أَيَّامٍ أَحَبُّ إِلىَ اللهِ تَعَالى أَنْ يُّتَعَبَّدَ لَه فِيْهَا مِنْ عَشْرِ ذِي الْحِجَّةِ يَعْدِلُ صِيَامُ كُلُّ يَوْمٍ مِنْهِا بِصِيَامِ سَنَةٍ، وَقِيَامُ كَلُّ لَيْلَةٍ مِنْهَا بِقِيَامِ لَيْلَةِ الْقَدْرِ (رواه الترمذي عن أبي هريرة)

“Parmi banne jours ki Allah pli content ki banne dimoune faire so ibaadate, c’est 10 jours de Zil Hijjah. Roza dans chaque jour de sa banne jours là li equivaut roza de ene banané et passe la nuit dans ibaadate dans chaque nuit li egale a sawaab de laylatoul Qadr.” (Tirmizi – rapporté par Abou Hourayrah )

D’après sa hadith là, nou realisé ki Allah ta’aalaa beaucoup content si nou faire ibaadate dans sa banne jours là. Et valeur de banne bon actions dans sa banne jour là li augmenté a tel point ki roza dans chacaine de sa banne jour la so sawaab li egal a sawaab de ene banané et si ene personne li passe sa banne nuits là dans ibaadate, li gagne sawaab comme si li fine passe laylatoul qadr dans ibaadate ki no tou conné ki li meilleur ki mille mois.

NOTE:- Li pas permette pou garde roza le jour de ‘Eidoul Adwhaa (Baqraa ‘Eid) et li deconseillé pou banne haji ki zotte garde roza le 9 Zil Hijjah.

Mufti N.Limbada

Le vrai goût de Imaan

ثلاث من كن فيه وجد حلاوة الايمان :ان يكون الله ورسوله احب اليه مما سواهما وان يحب المرأ لا يحبه الا لله وان يكره ان يعود فى الكفر كما يكره ان يقذف فى النار

(البخارى )

Celui ki ena trois qualités dans li, li pou gagne la (vrai) douceur de Imaan:

1. Ki Allah et so Rasoul (s.a.w) li cher à li plis ki tout kitchose,

2. Ki li ena ene qualité l'amitié avec ene dimoune ki li content li zisse acoze Allah Ta'ala, 

3. Ki li détesté pou retourne dans Kufr pareil couma li détesté l'idée pou tombe dans du feu.

Explication:

حلاوة الايمان veut dire la douceur de Imaan. Nabi  fine compare Imaan avec nourriture ki nou consommé pou montré ki Imaan aussi li ena ene goût couma banne nourriture ena goût. Mais ena des fois, ene dimoune li pas gagne le goût réel de ceki li pé mangé quand li malade et so la bouche gâté. Coumsa même quand ene dimoune li malade spirituellement, li pas gagne le vrai goût de Imaan et de banne ibaadat en général. Dans ça hadice-là, Rassouloullah  fine attire nou l'attention vers banne qualités ki nou bizin inculqué et développé dans nou pou nou gagne le vrai goût de Imaan.

حب عقلى   et    حب طبعى         Content ene kitchose, li vine dans deux façons:

Nou content ene kitchose acoze ki li satisfaire nou désir et nou capave gagne ene plaisir là-dans. Par exemple nou content bon menu, joli la caze, joli l'habillement etc. Dans content ça banne kitchose-là, nou pas bizin faire aukene zeffort. Li vine par li même. Ça façon content ene kitchose-là appelle حب طبعى.

Et parfois nou content ene kitchose zisse acoze ki nou trouve nou l'avantage là-dans malgré ki nou capave pé subir ene certaine genre de difficulté aussi. Par exemple ene médicament ki bien amer. Normalement ene dimoune li pas content ene tel médicament. Mais malgré ça li dérangé li alle la pharmacie, li acheté li et li pèse néné li boire li avec boucou difficulté. Li accepté faire tout ça-là zisse acoze so la santé. Ça façon content ene kitchose appelle li حب عقلى.

حب عقلى  li pas vine par li même. Bizin faire zeffort et donne de peine pou ça vine dans ou. Dans le hadice, c'est ça même genre de l'amitié ki fine être recommandé pou inculqué pou Allah Ta'ala et so Rasoul (s.a.w).

Ki veut dire content Allah Ta'ala et so Rasoul (s.a.w) plis ki tout kitchose?

Content Allah Ta'ala plis ki tout kitchose veut dire faire le maximum zeffort pou reste totalement dans l'obéissance Allah Ta'ala et sacrifié banne désir et plaisir pou le plaisir Allah Ta'ala. Disons ene dimoune li ena grand l'avantage dans ene certaine l'emploi mais li refuse accepté ça l'emploi-là zisse acoze li pas d'après ceki Allah Ta'ala content. Donc la personne fine sacrifié so l'avantage personnel pou le plaisir Allah Ta'ala. Coumsa même ou content kikene ki ou ti à voudrait gagne li comme ou partenaire dans ou la vie mais ou néglige l'idée pou alle de l'avant avec ça zisse acoze ça l'union-là li pas ene l'union ki autorisé d'après Shariah. Ici aussi ou fine sacrifié ou désir pou le plaisir Allah Ta'ala. Quand ou fine sacrifié ene certaine kitchose pou le plaisir Allah Ta'ala, ça veut dire ki ou content Allah Ta'ala plis ki ça kitchose-là. Quand ene personne li donne priorité à ceki Allah Ta'ala content lors ceki li même li content, ça veut dire ki li content Allah Ta'ala plis ki tout.

Dans commencement, sacrifié banne désirs paraite assez difficile mais après ene certaine le temps ou pou tellement adapté ki ou pou gagne ene dégoût réel pou banne péchés, et vive dans le plaisir Allah Ta'ala pou vine ene kitchose extrêmement délicieux. C'est ene stage cote subir toute sorte difficulté dans chemin Allah Ta'ala li vine facile.

Content Rassouloullah  (s.a.w) aussi plis ki tout signifié donne préférence le système de vie ki Nabi (s.a.w) fine enseigné lors tous banne lezot systèmes.

Bref nou gagne droit content kitchose ki nou oulé mais à condition ki ça pas faire nou casse l'ordre Allah Ta'ala et pas faire nou vive contre principe de Rassouloullah (s.a.w) Au moment ki nou fine faire ça, nou fine montré ki nou content Allah et so Rasoul (s.a.w) plis ki tout kitchose.

Content ene dimoune zisse acoze Allah Ta'ala

Quand ene dimoune content ene l'autre dimoune, ça capave vine dans plusieurs façons: Li capave content li acoze so richesse ou bien acoze so célébrité ou bien acoze so beauté. Ça façon content kikene appelle content par l'intérêt personnel ou bien acoze kit gain mondaine. Ça façon content kikene pas appelle content zisse acoze Allah Ta'ala. Content zisse acoze Allah Ta'ala veut dire content kikene sans aukene l'intérêt personnel ou gain mondaine. Par exemple ene dimoune li éprouve ene admiration pou ene kikene ki li ene Hafiz-ul-Qour'aan ou bien pou ene 'Aalim acoze so connaissance de Deen et so la piété. Content kikene dans ene façon pareil appelle content kikene zisse acoze Allah Ta'ala. Content kikene zisse acoze Allah Ta'ala li ene résultat inévitable de content Allah et so Rasoul plis ki tout kitchose. Quand ene dimoune li content Allah Ta'ala et so Rasoul plis ki tout kitchose, li pou content ceki Allah et so Rasoul (s.a.w)content. Li pou détesté ceki Allah et so Rasoul (s.a.w) détesté.

Allah Ta'ala li content banne personnages pieux. Donc li pou content banne personnages pieux. Li pou content la mode banne personnages pieux. Li pas pou montré so l'admiration pou banne acteurs-actrices ni pou zotte la mode.

Dégoût pou Kufr

Ene croyant ou ene Imaandaar pas capave ena en même temps l'admiration pou Kufr aussi dans so le cœur. Li bizin ena dégoût pou Kufr pou li capave vine ene bon musulman. Et ça dégoût-là li bizin tellement fort ki l'idée retourne dans Kufr ou commette kitchose de Kufr faire li senti ki li pé tombe dans du feu. Normalement ene dimoune li peur du feu. Si du feu fine prend quelque part, li pou faire le maximum zeffort afin ki li et so famille pas tombe là-dans. Dans la même façon, ene dimoune ki fine gagne le vrai goût de Imaan, pou faire le maximum zeffort pou reste loin de Kufr pareil couma li ti pou faire pou li pas tombe dans du feu.

Par Mufti M.R.Meerun